![](https://afaqnews.net/wp-content/uploads/2024/07/173-201559-hajar-ahmed-health-crisis_700x400.jpg)
هاجر أحمد.. أزمة صحية بعد «خسارة 250 ألف جنيه»
آفاق نيوز – تعرضت الممثلة المصرية هاجر أحمد لوعكة صحية طارئة، ونقلت لتلقي العلاج في أحد المستشفيات.
ونشرت هاجر أحمد صورة عبر حسابها على موقع “إنستغرام” من داخل المستشفى، وهي متصلة بجهاز تنفس
وفي وقت سابق، دخلت هاجر أحمد في خلاف مع مغسلة في مصر، اتهمتها بإتلاف حقيبتها من ماركة “ديور”.
وقالت الممثلة المصرية إن المغسلة أتلفت حقيبتها التي يبلغ سعرها 5 آلاف دولار (حوالي 250 ألف جنيه مصري)، مشيرة إلى أنها قدمت شكوى رسمية لجهاز حماية المستهلك ضد المغسلة الشهيرة في مدينة القاهرة الجديدة.
وكتبت الفنانة الشابة، عبر جروب شكاوى جهاز حماية المستهلك على “فيسبوك”، منشورًا تحدثت فيه عن تجربتها السيئة مع إحدى المغاسل ذات الفروع العديدة في منطقة القاهرة الجديدة.
وقالت: “من شهرين ونص اتصلت بمغسلة ليها فروع كتير في القاهرة الجديدة اسألهم إن عندي شنطة غالية نوعها كريستيان ديور باهظة الثمن، وفيها بقعة كدة بالألوان بسيطة بنتي عملاها، وسألتهم هل تقدروا تشيلوا البقعة دي ولا لأ؟ قالولي طبعا يا فندم، إحنا كل شغلنا شنط ماركات وشنط غالية، للعلم إن سعر الشنطة حاليًا تقريبًا 5000 دولار”.
وأضافت: “لأني عارفة إني لأزم أودي الشنطة للمكان بتاعها يظبطوها بس المشكلة أن أقرب مكان ليا دبي، وأنا مش مسافرة دبي الفترة دي أبدًا، بعد ما تواصلت معاهم أكدولي أنهم يقدروا ينضفوها بسهولة، وأنهم كمان بيستخدموا نفس المواد اللي الكريستيان ديور بيستخدموها، قُلت أنا هديكم الشنطة وشوفوا هتعرفوا ولا لأ، لو لا ابعهتوهالي، وأكدت عليهم فوق الـ 50 مرة، قالولي إحنا عندنا فني بيحدد كمان هل يقدر يعمل كده ولا لأ ومش هنجازف يا فندم طبعًا”.
وأكملت: “اتصلت بيهم قُلتلهم بصيتوا على الشنطة ولا لأ، قالولي طبعًا سهلة جدًا وهتوصل خلال أسبوع متقلقيش، قُلت تمام وأكدت أنها مش بتتغسل بماية ولا بتدخل غسالة، قالولي لا طبعًا لا ماية ولا غسالة ليها مواد معينة”.
وتابعت: “سبتهم خالص وبعتهولي بعد أسبوع، والصدمة كانت اللوجو بتاعها اللي بـماء الدهب ممسوح، والشنطة محروقة من جوة والإيد بتاعتها مكسورة، ومتقطعة من الجناب كلها دايبة وكل معالمها راحت، اتصلت بيهم قُلتليهم عايزة صاحب المكان كلمت واحد مش فاكرة اسمه، وقالي أنا شريك في المكان ونعملك اللي إنتي عايزاه، وتحت أمرك وكان محترم أوي أول مكالمة وقالي ابعتيلي الشنطة”.
وأضافت: “بعتله الشنطة اللي حاطنها في كيس بلاستيك، وبعتوهالي تاني وحط فيها كيس منفوخ عشان تسند طولها وبعتلي معاها بوكيه ورد، طبعًا أنا رجعت الورد، وشوفت الشنطة، وكلمت الراجل قُلتله عملت إيه قالي رجعتهالك جديدة، قُلتله حضرتك واعي للي بتقوله الشنطة اتحرقت أنتم ضحكتوا عليا، الشنطة مبقاش ليها معالم واللوجو بتاعها اتمسح”.
واستطردت: “يرد يقولي ما هو ده اللي أنتِ هتسامحيني فيها، قُلتله لا طبعًا علي فكرة أنتم سمعتكوا وحشة جدًا، وناس كتيرة عندهم تجارب سيئة معاكم، وعندي سكرين شوت أنكم بوظتوا حاجات كتير جدًا وكلها غالية، لأني سألت عليهم، قالي طيب مدام أنتِ عملتي كده، اللي تعرفي تعمليه اعمليه وأخبطي راسك في الحيطة”.
وأوضحت هاجر أحمد أنها تقدمت بشكوى لحماية المستهلك، وكتبت: “تقدمت بشكوى لحماية المستهلك، وبالفعل كلموني، أخدوا تفاصيل اللي حصل، صور وفيديو وسكرين شوت، لأني كلمت الشخص اللي شريك في المغسلة، على الواتس اب وبعتلي ڤيديو قبل وبعد، وڤيديو لغسيل الشنطة بسلك المواعين في طبق بلاستيك، بعت وأوفيت كل التفاصيل للواقعة”.
وأضافت: “محدش أهتم، كل أسبوعين يكلموني يقولوا ممكن تقلنا إيه اللي حصل قُلت في حاجة مش مظبوطة أنا كل أسبوعين بحكي وببعت كل حاجة ومحدش بياخد فعل، وفي مرة مكالمة معاهم قالولي هو مش الراجل بعت ورد ليكي، استغربت جدًا”.
وكشفت الفنانة الشابة عن رد جهاز حماية المستهلك الصادم: “وآخر مكالمة حماية المستهلك قالولي الفاتورة بتاعة الشنطة اللي هيا 250 جنيها هيدوهالك تقريبا 10 أضعاف وده قانون حماية المستهلك”.
واختتمت: “لما كلمت حماية المستهلك اتحكالي عن مشاكل المغسلة دي وبلاويهم كتير وأنا حليت ليهم مشاكل كتير قبل كده، المهم محدش كلمني تاني، فضلت شهرين ونص منتظرة ياخدوا موقف محدش عمل حاجة، عشان كده قررت أكتب عنهم، تجربة سيئة وناس مش صادقة وكذابين وغير أمناء حقيقي اللي مستغني عن حاجته يبعتهالهم”.
العين الاخبارية