✍ بقلم: أبو المرصاد – آفاق نيوز
طلع علينا عطوفة أمين عام وزارة التربية بتصريح ناري – أو بالأحرى “مبهمي”، لما سُئل عن مصير نقابة المعلمين، وقال:
🔻 “إلي حبِلها يولدها”
وأبو المرصاد، وهو دايمًا صاحي للغفلة، وقف وسأل حاله:
من إمتى النقابات بتتحبل وتولد لحالها؟
وكيف بدها تولد وهي تحت الحجر، وممنوع عليها تتنفس؟!
يعني عطوفتك، النقابة مش نبتة برّية تركينها تشوف مصيرها،
ولا قضية قدَر تستنى نجمة الصبح لتصير قابلة قانونية!
هاي مؤسسة وطنية…
صوت المعلم… كرامته… ممثله قدام الحكومة، مش قصة بيولوجيا ولا دراما!
أبو المرصاد بلخّصها هيك:
“إذا كانت النقابة بدها تحبل وتولد لحالها،
فاسألوا: مين اللي قصّ الحبل السرّي من الأصل؟!”
وقبل ما يسد الدفتر، قال:
“الوطن ما بنبنى على تغييب أهل التربية،
وبلاش نضحك عحالنا ونقول: اللي بحبِل… يولّد!”
انتهى كلام أبو المرصاد… وباب النقد ما بينسدّ.
