بقلم ابو المرصاد بالمرصاد
“لما كنت على البكب كنت أشوف الأردن ساحة، ولما دخلت المجلس صار وطن!”
هيك قال العين عمر عياصرة… وقالها وكأن الوطنية صارت وظيفة، والكرسي هو مفتاح الانتماء.
* يعني اللي بصرخ من وجعه بالشارع صار مش وطني؟
* واللي بتظاهر ضد الفساد صار شايف البلد “ساحة” مش “وطن”؟
* واللي ما دخل من باب المجلس، ينسحب منه حقه بالصوت والشراكة؟!
أبو المرصاد بيحكيها بلا رتوش:
الوطن مش كرت عضوية، والوطنية مش رخصة بتصدرها الحكومات حسب المزاج.
اللي بنزع صفة الوطنية عن الناس لمجرد إنهم مش معه… هو أول واحد لازم يتسحب من تمثيلهم.
سؤال لصنّاع القرار:
هل تصريح العياصرة بيقع تحت بند “إثارة النعرات” أو “الذم والتشهير”؟
ولا هاي الجرائم الإلكترونية “كوول” إذا كانت بتخدم مصلحتكم؟!
من الشارع بنحب الأردن، ومن وجعنا بنصيح، وإذا الوطن صار امتياز… فاعلموا أنكم صنعتم منه “شركة” مش “أمة”.
