نبيل عماري
يا قريتنا الحلوة لقمح حصيدتك بحن
لصحن لبن مشخول وشقفة خبز تكفيني
لسهرة وتعاليل ولما صوت الربابة يعن
لميات من البير والجرة ترويني
بتذكر يا قرية فجرك المندي الصحيان
ع الصبح بكير نلقط توتات البستان
وتحت معرشات الدوالي الكل سهران
نار الشوق لزمان أول بتكويني
أخ يا زمان الحوش والدار
والجد بيدخن تتن وبيقولوا عنه هالختيار
وع طفطاف البرندة وردات مليانة زرار
وقبالنا بحد هالسور شجرة التيني
وبتذكر قعدات الجيران والقرايب بالحارة
بسمعوا اخبار ويلعبوا بطاولة الزهر وحجارا
وع الصاج بتخبز الجدة الختيارة
وفنجان قهوة ع العتبة مع الجارة
وبحن لزمان أول ويزداد حنيني
كبرنا وكبر فينا هالعمر
والدنيا صارت تلعب بينا مثل الزهر
والذكريات بقلوبنا صارت زي الجمر
بتقول ع قريتنا الحنونة وديني
