بقلم ابو المرصاد
يا معالي الوزير، بالله عليك… لما تقول قدّام الكاميرات إنه في 430 ألف شاب وشابة قاعدين بلا شغل، شو الرسالة اللي بدك توصلها؟
يعني إحنا نضحك؟ نعيط؟ نغني موال؟ ولا نحجز طيارة ونهاجر؟
أبو المرصاد بسألك يا سعادة الوزير:
– هل هذا الرقم هو الحقيقي؟
ولا اللي تحت الطاولة أكثر؟ لأنك ناسي تضيف إلهم اللي زهقوا وتركوا البلد، واللي شغالين بأشغال ما بتسُد ثمن مواصلاتهم!
– طيب، شو خطتك؟
هلّا منعرف خطة الطوارئ، وخطة التحديث، وخطة التعافي، وخطة الشراكة، بس ولا خطة لوقف “النزيف الشبابي”.
– طيب شو برنامجك؟
تصوير، اجتماع، تصريح، ومذكرة تفاهم؟ ولا في إشي حقيقي على الأرض؟
الشباب مش ناقصهم وعود… ناقصهم أمل، شغل، مشروع صغير، أو حتى فرصة مش مدفوعة بواسطات.
والله يا معالي الوزير، شكلها الخطة كالتالي:
“نعلن رقم بطالة جديد كل سنة، ونحضر مؤتمر ونحكي عن أهمية تمكين الشباب… والسلام عليكم”.
بس أبو المرصاد بقولك:
1. انزل على الميدان… وخلّي الشباب يشوفوك مش بس بوسائل الإعلام.
2. فعّل التدريب المهني الحقيقي، مش دورات الفوتوشوب على ورق.
3. اربط التعليم بسوق العمل مش بالديكور.
4. وافتح بوابات توظيف نزيهة بدون قرايب ومعارف ومحسوببات .
ترى إذا ما صار تغيير ملموس…
الرقم رح يصير 500 ألف…
