وزير التعليم العالي عزمي محافظة طلع وقال إن كل الجامعات الأردنية الرسمية بالفئة الحمراء بنزاهة البحث العلمي
سرقات، تزوير، أبحاث مولّدة بالذكاء الاصطناعي
واللي ما قدر يشتري عقل، اشترى تصنيف
جامعات بتدفع مصاري عشان تظهر بالتصنيفات العالمية
بإعلانات، وبأسماء أساتذة أجانب مش إلهم
بدل ما يستحوا… زعلوا
بدل ما الجامعات تحكي:
“شكراً يا معالي الوزير، خلينا نفتح تحقيق ونصلح الوضع”
زعلوا
حكوا إنو الوزير بيشوّه سمعة التعليم العالي بالأردن
طيب يا سادة…
لما تكون جامعتك بتشتري ترتيبها
وبتمنح درجات علمية على أبحاث مولدة بنص ساعة من الذكاء الاصطناعي
هاي سمعة؟ ولا فضيحة؟
الوزير شجاع… بس مش كفاية
تصريحك يا معالي الوزير ممتاز
بس إذا ما صار في إجراءات بعده
فهو مجرد زوبعة وبيختفي
بدنا تحقيق شفّاف، متابعة، ومحاسبة
بدنا تغيير جذري، مش تصريحات موسمية
الجامعات مش ضحية
بعض رؤساء الجامعات فرحانين بالتصنيف
وما حد سأل: كيف وصلوا لهون؟
مجلات مشبوهة، أسماء وهمية، وبحوث نص كم
والمطلوب من المجتمع الأكاديمي إنه يسكت؟
لا والله
رباط السالفة..
إذا الجامعات ما بتتحمل النقد
فكيف بدها تعلم الطلاب يتقبلوا الحوار؟
وإذا التصنيف أهم من النزاهة العلمية
فالأفضل نحول الجامعات لمراكز علاقات عامة
مش مؤسسات علم
يا وزير التعليم العالي: كمل وافتح الملفات كلها
يا جامعات: اشتغلوا وخلي التصنيف نتيجة مش هدف
يا ناس: مش كل دكتور علامة، ومش كل بحث علم
