بقلم: أبو المرصاد – آفاق نيوز
في مشهد جديد من مشاهد “اللخبطات الرسمية”،
وقع بين إيدينا كتابين تنسيب من جهة مسؤولة،
واكتشفنا إنهم عاملين خريطة الأردن على كيفهم…
وزعوا الأسماء كأنها أرقام طاولة بعرس، مش تمثيل مهني ونقابي!
خلونا نحكيها بدون لف ودوران:
🔹 المهندس فراس الحراحشة، وهو عضو في نقابة المهندسين الزراعيين، بالمفرق،
لقيناه “منسّب” مرتين… مرة في الزرقاء ومرة في المفرق!
يا جماعة، الإنسان واحد… مش نسخة قابلة للنسخ واللصق!
🔹 المهندس المعايطة، وهو عضو فعلي في نقابة المهندسين فرع الزرقاء،
شاف اسمه طاير للكرك بس لأنهم “فكّروا” إنه من الكرك عشان اسمه معايطة!
يعني التنسيب ما تم بناءً على التمثيل الفعلي… بل بناءً على تحزير عائلي!
نقيب المهندسين الزراعيين – م. علي أبو نقطة،
اللي سحب فرامل الطوارئ، وبعث كتاب واضح قال فيه:
– رجّعوا الحراحشة لمفرقها،
– وودّوا المعايطة ع الزرقاء،
– ودوروا حدا من فرع النقابة جديد للكرك… من أهلها، مش بالقرعة!
خلاصة أبو المرصاد:
هاي مش أول مرة، وبخاف تكون مش آخر مرة…
بس كلنا لازم نعرف إن التنسيب مش “تسلية مؤسسية”،
ولا المحافظات أوراق شدة نلعب فيها “كمبيلة”!
فيه ناس بتتعب، بتمثل، بتشتغل… ما بصير يتم التعامل معها كأسماء على ورق بلا قيمة.
وكل الاحترام للنقابة، إللي ما سكتت عالخطأ، وما طلبت غير التصويب والعدالة.
وأخيرًا… إذا بدنا نصلح البلد،
لازم نبدأ من إنّا نحترم اسم كل واحد في موقعه…
ونعرف الفرق بين:
الزرقاء، الكرك، والمفرق
مش بس عالخريطة…
بل بقيمة الناس اللي بتمثلها!
